بمناسبة أغنية أبله فاهيتا اللى عجبتنى انا شخصيا . ان الناس مايستهلوشى
مايستهلوشى كل الأهتمام و الخوف من كلامهم و مايستهلوشى انك تغيرى نفسك عشانهم

كل ما افكر اكتب كلام بشكل عام الاقى نفسى بحكى عن تجربه شخصيه ليا. عشان كده انا هحكى تجربه يمكن كانت من اقسى التجارب اللى مريت بيها فى حياتى و اتعلمت منها كتير جدا.

لما كنت فى اولى اعدادى كان وزنى حوالى 80 كيلو و كان يعتبر وزنى زائد شويه و مكنتش مهتمه بالموضوع ولا كان بياخد حيز من تفكيرى أبدا . لو بلوزه بقت ضيقه فيها ايه لما أجيب مقاس أكبر الموضوع مكنش بيمثلى مشكله نهائى و مكنتش بتكسف لما أقول ان مقاسى 2 أكس.
لكن الموضوع كان شاغل تفكير اللى حواليا ابتداءا من اخواتى و ماما لحد الجيران و صاحبات ماما! !!
ناس ملهمش علاقه بيا نهائى بس أدوا لنفسهم الحق و الصلاحيه انهم ينتقدوا شكلى و وزنى بس اللى كان ليه التأثير الأقوى هم صاحباتى و انتقادهم ليا ده أذانى نفسيا لأنى كنت لسه صغيره و كان طبيعى اتأثر بكلام الناس.

اصبت بأحباط وعدم ثقه فى النفس و أخدت قرار انى هخس و طبعا قرار زى ده كويس لكن الطريقه نفسها هى اللى كانت غلط .منعت نفسى من الاكل بشكل نهائى وكنت بمارس تمارين رياضيه قاسيه جدا . طبعا ده خلانى افقد وزن بسرعه لكن مهما كنت بفقد وزن كنت دايما شايفه نفسى وزنى زايد و فضلت افقد وزن بشكل سريع و فى اقل من سنه وصلت ل49 كيلو.
طبعا كنت فرحانه بالأنجاز ده و اخيرا خسيت و وصلت لوزن قليل .

لكن اللى حصل ان اللى حواليا فضلوا بردو ينتقدوا و ازاى انا خسيت اوى كده و شكلى اتغير و مبقتش جميله زى الاول و كل واحد بردو أدى نفسه الحق انه ينتقدنى و كل واحد فضل يحلل التصرف اللى انا عملته و أذيت نفسى بيه على حسب مزاجه و مجاش على بالهم يوم انى عملت كده بسببهم هم و بسبب انتقادهم و كلامهم .

طبعا لما درست الطب اكتشفت ان دى حاله نفسيه اسمها Anorexia nervosa
و الحاله دى بيمر بيها نسبه كبيره من المراهقين " و خاصة البنات" و هى انهم مبيبقوش راضيين عن شكلهم أو وزنهم و بيمتنعوا عن الاكل و طبعا الموضوع ليه مضاعفات و بيأثر على النمو فى المرحله دى و بيعمل خلل فى الهرمونات و لو الحاله بقت شديده ممكن يسبب مشاكل فى الكلى.

تخيلوا ان التأثر بكلام الناس ممكن يجيب المرض! تخيلوا ان فعلا فى امراض الطب معترف بيها واسبابها هى تأثر المريض نفسيا و انعدام ثقته بنفسه و اللى اهم اسبابها هى الاهتمام برأى الناس.

يمكن مهما حاولنا هيفضل كلام الناس له تأثير علينا بس لازم نخليه اقل تأثير ممكن يحصل و لازم نعرف ان الناس مش هيعجبها حاجه و مهما عملتى هيتكلموا.

دلوقتى انا مبتكسفش لما أقول انى وزنى بيزيد ايام الامتحنات و انى بحب الأكل و ان مقاسى أكس و مقاس رجلى 40 . انا مش موديل و مش عاوزه أكون موديل و انا مش بنوته كيوت و رقيقه انا بحب المصارعه  و بكره الطبيخ و مبحبش اعمال البيت و مبحبش الكعب العالى  و عاوزه اسافر و الف العالم . و اللى مش عاجبه يتفلق .
و اللى شايفنى مغروره او انانيه  يتفلق

و اللى مش عاجباه يشرب من البحر ^_^

فى النهايه الرساله  اللى عاوزه اوصلها انك تخليكى زى ما انتى عاوزه مش زى ما اللى حواليكى عاوز .